10.10.2025, 09:29 316
- Bu gün Şanlı Vətən Müharibəsinin qəhrəman şəhidi Heydər Ağahüseyn oğlu Qənbərzadənin doğum günüdür. O, 10 oktyabr 1997-ci ildə Lənkəran rayonunun Cil kəndində dünyaya göz açıb. Kənddə orta məktəbi bitirdikdən sonra 2013-cü ildə Lənkəran Dövlət Humanitar Kollecinə qəbul olunub. 2017-ci ildə Kollecin “Fiziki tərbiyə müəllimliyi” ixtisasını müvəffəqiyyətlə bitirib. Heydər müddətli həqiqi hərbi xidmətini başa vurub müddətdən artıq həqiqi hərbi xidmət qulluqçusu olaraq Çavuş rütbəsi ilə Vətənə xidmətini davam etdirib.
Çavuş Heydər Qənbərzadə 2020-ci il sentyabrın 27-dən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində pulemyotçu-tuşlayıcı kimi Füzuli, Hadrut, Zəngilan, Cəbrayıl, Qubadlı və Şuşa şəhərinin azad olunması uğrunda gedən döyüşlərdə iştirak edib.
Heydər Qənbərzadə 8 noyabr 2020-ci ildə Şuşanın azad edilməsi uğrunda gedən döyüşlərdə döyüş tapşırığını yerinə yetirərkən qəhrəmancasına şəhadətə ucalıb.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin müvafiq sərəncamlarına əsasən Heydər Qənbərzadə ölümündən sonra "Vətən uğrunda", "Füzulinin azad olunmasına görə" və "Şuşanın azad olunmasına görə" medalları ilə təltif edilib.
Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!
Mina RƏŞİD
