31.08.2025, 02:40
AZ EN
29.08.2025, 09:01 225

Bu gün şəhid Rüstəm İsmayılovun doğum günüdü

XƏBƏRLƏR
  • Rüstəm Moskvada psixologiya üzrə təhsil alırdı. O təhsilini dondurub Azərbaycana gəlir. Ancaq 2020-ci ildə baş verən İyul hadisələrindən sonra geri qayıtmır. Sentyabrın əvvəllərində müddətdən artıq hərbi qulluqçu kimi Vətənin müdafiəsinə qoşulur. Bundan iki həftə sonra müharibə başlayır. İgid Vətən oğlu Murovdağ istiqamətində şəhadətə ucalır. Rüstəm qarla oynamağı, belə havalarda şəkil çəkdirməyi sevirdi. Onun nəşi elə qarlı-şaxtalı bir gündə də, şəhadətindən düz 70 gün sonra tapılaraq doğma torpağa tapşırılır...

Bu gün Vətən müharibəsinin qəhrəman şəhidi İsmayılov Rüstəm Üzeyir oğlunun doğum günüdü. O, 29 avqust 1995-ci ildə Daşkəsən rayonunda anadan olub. Orta təhsilini İ.Nəsimi adına 1 saylı tam orta məktəbdə alıb. 2013-cü ildə hərbi xidmətə yollanıb və ön xətdə yerləşən hərbi hissələrin birində başa vurub.
Rusiyada psixologiya üzrə ali təhsil alsa da, təhsilini dondurub Vətənə qayıdıb. Müharibə havasını hiss edən Rüstəm müddətdən artıq hərbi qulluqçu kimi Vətənə xidmətə başlayıb.
Azərbaycan Ordusunun əsgəri olan Rüstəm İsmayılov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsinə qatılıb.

Müharibədə şücaətlər göstərən Rüstəm İsmayılov 2 oktyabr 2020-ci ildə Vətən müharibəsinin Kəlbəcər-Murov istiqamətində qəhrəmancasına şəhadətə ucalıb.
Şəhidimizin mübarək nəşi düz 70 gündən sonra tapılaraq ailəsinə təhvil verilib.

17 dekabr 2020-ci ildə şəhid Rüstəm İsmayılov doğma Daşkəsən rayonunun Şəhidlər Xiyabanında böyük izdiham və ehtiramla torpağa tapşırılıb.
Şəhid Rüstəm İsmayılov döyüşlərdə göstərdiyi şücaətlərə görə Azərbaycan Respublikası prezidentinin sərəncamları ilə “Kəlbəcərin azad olunmasına görə” və  “Vətən uğrunda” medalları ilə təltif olunub.

Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!

Mina RƏŞİD

Oxşar xəbərlər