11.06.2025, 16:27 183
- 2023-cü ildə Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə "Qədim İrəvan: hər daşı bir abidə" sənədli filmini hazırladıq. Sənədli film əsasən tarixi mənbələrə istinad edir. Keçmiş irəvanlılardan, xan nəslindən olan şəxslərdən bəhs edən sənədli filmdə Pənahəli xanın oğlu Əli xanın nəvəsi Ofeliya xanım da iştirak edir. O, filmdə nənəsinə və babasına aid xatirələrindən danışır. Ekran əsərində, həmçinin İrəvan şəhəri və onun tarixi ilə bağlı həqiqətlər də öz əksini tapıb.
Bu sözləri açıqlamasında "Elmi Araşdırmalar" İctimai Birliyinin sədri Telman Qasımov söyləyib.
QHT sədrinin sözlərinə görə, filmdə tarixi sənədlərə, araşdırma materiallarına əsasən, ermənilərin etirafına da yer verilib. Belə ki, onlar İrəvanın müsəlmanlara, türklərə aid şəhər olması, orada neçə məscidin və karvansaranın yerləşməsi barədə də danışırlar.
"Sənədli filmin təqdimatından sonra Ermənistan tərəfindən çox kəskin reaksiya verildi, geniş müzakirələrə səbəb oldu. Lakin artıq gec idi, çünki faktlar əlimizdə idi. Həm də bu, ermənilərin etirafından bəhs edən 4-cü filmimiz idi”, - deyə T. Qasımov əlavə edib. (AZƏRTAC)
