07.11.2024, 22:24 124
- Görüşün keçirilməsində məqsəd gənclər və idman sahəsində həyata keçirilən layihələr haqqında tələbələri məlumatlandırmaq, onların inkişafını dəstəkləyən fəaliyyət istiqamətlərini müzakirə etməkdir.
Tədbir Azərbaycan Respublikasının Dövlət Himninin səsləndirilməsi və ərazi bütövlüyümüz uğrunda canından keçən şəhidlərin xatirəsinin bir dəqiqəlik sükutla yad edillməsi ilə başlayıb.
Qarabağ Universitetinin rektoru Şahin Bayramov tədbirdə açılış nitqi ilə çıxış edərək iştirakçıları salamlayıb. Rektor ali təhsil ocağının tələbəyönümlü və tədqiqat əsaslı olduğunu və bu istiqamətdə müxtəlif layihələrin həyata keçirildiyini diqqətə çatdırıb. Ş.Bayramov qeyd edib ki, Gənclər və İdman Nazirliyi tərəfindən təşkil olunan qrant müsabiqələr, layihələr tələbələrin fiziki və zehni inkişafını dəstəkləyərək onların potensialını daha da artırmağa xidmət edir. Rektor bu fəaliyyətlərin gənclərin həm akademik, həm də sosial sahələrdə uğur qazanmalarına zəmin yaratdığını vurğulayıb.
Gənclər və idman naziri Fərid Qayıbov çıxışında Zəfər Günü ərəfəsində Qarabağ Universitetində olmaqdan məmnun olduğunu ifadə edib. Nazir gənclər və idman sahəsində həyata keçirilən müxtəlif layihələri tələbələrin diqqətinə çatdırıb və bu istiqamətdə reallaşdırılan fəaliyyətlərin gələcəkdə daha da inkişaf etdiriləcəyini bildirib.
Görüş tələbələrin sualları əsasında qurulan interaktiv müzakirələr formatında davam edib.
Tahirə AĞAMİRZƏ
