25.09.2024, 09:16 256
- 44 günlük Şanlı Vətən Müharibəsinin qəhrəmanlarından biri də şəhid Tacir Hasil oğlu Muradlıdır. Şəhidimiz 2000-ci il sentyabrın 25-də Beyləqan rayonunun Mil qəsəbəsində anadan olmuşdu.
Azərbaycan Ordusunun müddətdən artıq hərbi qulluqçusu Tacir Muradlı 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın, Füzulinin və Qubadlının azadlığı uğrunda gedən döyüşlərdə mərdliklə savaşıb. Onu da bildirək ki, Tacir 2-ci Ordu Korpusunun Komandir müavini Şükür Həmidovun şəxsi mühafizə heyətinin üzvü idi.
Tacir Muradlı oktyabrın 22-də Qubadlı döyüşləri zamanı qəhrəmancasına şəhadətə ucalıb. Şəhidimiz doğma Beyləqan rayonunda böyük izdiham və ehtiramla torpağa tapşırılıb.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin müvafiq sərəncamlarına əsasən Tacir Muradlı ölümündən sonra "Vətən uğrunda", "Cəbrayılın azad olunmasına görə" və "Füzulinin azad olunmasına görə" medalları ilə təltif edilib.
Vətənin igid oğlu Tacir Muradlı 20 yaşında şəhidlik zirvəsinə ucalıb. O, torpaqlarımızın azad edilməsi yolunda canını fəda edərək adını qanıyla Şanlı Zəfər tariximizə əbədi olaraq həkk elədi.
Bu gün qəhrəman şəhidimizin doğum günüdür.
Cənnətdəki doğum günün mübarək, məzarın nurla dolsun, ruhun şad olsun, qəhrəman Tacir balamız!
Mina RƏŞİD
