• Abdurahmangil ailədə üç qardaş olublar və hər üçü də hərb sahəsini seçib. Böyük qardaş Elşən artıq 25 ildir ki, hərbi hava qüvvələrinin baş giziridir. Abdurahmanın əkiz qardaşı Abdullah da uzun müddət hərbi forma geyinib. Qardaşların hər üçü hərbçi olduğuna görə müharibənin də nə olduğunu yaxşı anlayırdılar. Abdurahmanı tanıyanlar deyirlər ki, o çox vətənpərvər olub. Çox danışmağı sevməyən Abdurahman İsrafilov hər dəfə məzuniyyətə gələndə Aprel şəhidlərinin ailələrinə baş çəkər, onlara hədiyyələr apararmış.

Müddətdən artıq hərbi qulluqçu olan baş çavuş A.İsrafilov həm snayperçi, həm də kəşfiyyatçı kimi təlimlərə qatılmış, xüsusi hazırlıqlar keçmişdi. O, Vətən müharibəsində ən qaynar nöqtələrdə vuruşub. Abdurahman döyüşlərdə olarkən qızı dünyaya gəlib, komandiri ona övladını görməyə icazə versə də o bunu qəbul etməyib və körpəsini görmədən şəhadətə ucalıb...

Bu gün Vətən Müharibəsinin qəhrəman şəhidi, baş çavuş Abdurahman İsrafil oğlu İsrafilovun doğum günüdür. O, 1991-ci il iyunun 11-də Zaqatala rayonunun Qımır kəndində anadan olub. 1997–2008-ci illərdə İ. Məmmədov adına Qımır kənd tam orta məktəbində təhsil alıb. Abdurahman İsrafilov 2009–2011-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2011–2016-cı illərdə Sərhəd Qoşunlarının, 2019-cu ildən isə Quru Qoşunlarının sıralarında müddətdən artıq həqiqi hərbi xidmət qulluqçusu olub.

Azərbaycan Ordusunun baş çavuşu olan Abdurahman İsrafilov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın, Füzulinin və Qubadlının azadlığı uğrunda gedən döyüşlərdə savaşıb.

Abdurahman İsrafilov oktyabrın 21-də Qubadlı döyüşləri zamanı qəhrəmancasına şəhadətə ucalıb. Şəhidimiz böyük izdihamla doğma Zaqatalada torpağa tapşırılıb.

Azərbaycan Prezidenti İlham Əliyevin müvafiq sərəncamlarına əsasən Abdurahman İsrafilov ölümündən sonra "Döyüşdə fərqlənməyə görə", "Vətən uğrunda" və "Füzulinin azad olunmasına görə" medalları ilə təltif edilib.

Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!

Mina RƏŞİD