18.11.2025, 11:39 212
- Azərbaycanın XX əsrdə yaşadığı çətinliklər və tarixi sınaqlar xalqın milli iradəsini möhkəmləndirib.
Bu sözləri ABŞ-ın Azərbaycandakı sabiq səfiri Metyu Brayza “Azərbaycanın ərazi bütövlüyü və suverenliyinin bərpası: beynəlxalq hüquqi aspektlər” mövzusunda keçirilən elmi-praktiki konfransda onlayn formatda çıxış edərkən səsləndirib.
O bildirib ki, 1991-ci ildə müstəqilliyini bərpa edən Azərbaycan dövlət institutlarını yenidən quraraq öz suverenliyini möhkəmləndirib.
“Ölkəniz iqtisadi və sosial sahələrdə strateji əməkdaşlıqlar quraraq, beynəlxalq platformada öz mövqeyini gücləndirdi. Azərbaycanın enerji, infrastruktur və təhsil sahələrində həyata keçirdiyi layihələr milli inkişafın əsas sütunlarını təşkil edir. Eyni zamanda, ölkəniz regionda sabitlik, əməkdaşlıq və hüquq prinsiplərinin təmini istiqamətində vacib addımlar atır”, - deyən sabiq səfir əlavə edib ki, 2020-ci ildə Qarabağın işğaldan azad olunması və 2023-cü ildə həyata keçirilən əməliyyatlar Azərbaycanın suverenliyinin təmin olunmasının bariz nümunəsidir. Bu Qələbə xalqın birliyi, siyasi iradə və hüququn aliliyinin nəticəsidir.
“Azərbaycan həm daxildə, həm də beynəlxalq səviyyədə insan haqlarına hörmət və qanunun aliliyinə əsaslanan inkişaf yolunu davam etdirir. Bu, digər dövlətlər üçün nümunədir və göstərir ki, qətiyyətli iradə və hüquqi əsaslarla istənilən çətinliyin öhdəsindən gələ bilərsiniz",-deyə M. Brayza vurğulayıb. (AZƏRTAC)
