• Zəngəzur dəhlizi tranzit yükdaşıması imkanlarına və iqtisadi səmərəlilik dərəcəsinə görə Bakı-Tbilisi-Qars dəmir yolundan daha çox üstünlüyə malik olacaq.

"Vətən səsi" xəbər verir ki, bunu erməni politoloq Samvel Meliksetyan bildirib. O, qeyd edib ki,  coğrafi və iqtisadi amillər Cənubi Qafqazda nəqliyyat-kommunikasiya xətlərinin bərpasında həlledici rol oynayacaq: "Cənubi Qafqazda kommunikasiya xətlərinin bərpasına başlanarkən sanki, region ölkələri arasında siyasi sərhədlər yox imiş kimi düşünmək çox vacibdir. Əgər siyasi sərhədlər olmasaydı, ən əlverişli və optimal yolları seçərdik. Nəzərə almaq lazımdır ki, Cənubi Qafqaz kiçik region deyil – burada üç ölkədən başqa Azərbaycanın Naxçıvan anklavı da mövcuddur. Buna görə də qarşılıqlı əlaqələr mürəkkəb coğrafi şəraitlə bağlıdır. Bu, Zəngəzur dəhlizi üzrə inşa olunacaq xətlərin Bakı-Tbilisi-Qars dəmir yolu ilə müqayisədə daha səmərəli olmasını da şərtləndirir".

Erməni təhlilçi "TRIPP yolu" və ya Zəngəzur dəhlizi layihəsinin regionun nəqliyyat infrastrukturunun ana xətti olacağı fikrini təsdiqləyib. Samvel Meliksetyan etiraf edib ki, ölkəsinin Azərbaycana hərbi təcavüzü nəticəsində regionun balansı pozulub, oturuşmuş iqtisadiyyat dağılıb, nəqliyyat infrastrukturu bloklanıb. Onun sözlərinə görə, son 30 ildə regionda baş verən münaqişələr bölgədən keçən nəqliyyat marşrutlarına mənfi təsir göstərib: "Bu, yalnız Qarabağ deyil, həm də Abxaziya konflikti ilə bağlıdır ki, onun nəticəsində Rusiya-Gürcüstan-Ermənistan dəmir yolu bağlanıb. Eləcə də Ermənistanla Azərbaycan arasında bütün əlaqə xətlərinin kəsilməsi regiondakı kommunikasiya sisteminin ümumi tənəzzülünə səbəb olub".

Meliksetyan qeyd edib ki, avqustun 8-də Vaşintonda əldə edilmiş razılaşmalar Cənubi Qafqaz regionunda nəqliyyat infrastrukturunun beynəlxalq tələblərə uyğun şəkildə yenidən qurulmasına geniş imkanlar yaradıb. Belə ki, "TRIPP yolu" adlandırılan Zəngəzur dəhlizi qlobal əhəmiyyətli layihə statusu daşımaqla yanaşı, həm də Azərbaycanın əsas hissəsi ilə Naxçıvanın birləşməsini nəzərdə tutur: "Bu məsələ Azərbaycan üçün həmişə önəmli olub, indi də müzakirələrdə ön plandadır".

Elxan SALAHOV