• Ermənistan "Beynəlxalq Sülh və Rifah naminə Tramp Marşrutu" və ya qısaca olaraq "TRIPP yolu" adlandırılan Zəngəzur dəhlizi layihəsi üzrə əməli fəaliyyətə başlamağa hazırlaşır.

"Vətən səsi" xəbər verir ki, bunu Ermənistan Respublikası Təhlükəsizlik Şurasının katibi Armen Qriqoryan  MDB ölkələrinin Təhlükəsizlik Şuraları katiblərinin dünən Moskvada keçirilən 13-cü iclasında çıxışı zamanı bildirib. O, qeyd edib ki, Cənubi Qafqaz regionu, həm siyasi, həm infrastruktur, həm də ideoloji müstəvidə mühüm dəyişikliklər dövrünü yaşayır: "2025-ci il avqustun 8-də Ermənistanın baş naziri Nikol Paşinyan, Azərbaycan Prezidenti İlham Əliyev və ABŞ Prezidenti Donald Trampın görüşünün keçirildiyi Ağ Evdə baş vermiş tarixi hadisəni, xüsusilə qeyd etmək istərdim. Vaşinqton sazişi nəticəsində Cənubi Qafqazda sülh bərqərar oldu və indi biz Azərbaycanla sülhün institutsionallaşdırılması üzərində işləyirik".

Erməni siyasətçi vurğulayıb ki, institusionallaşmanın tərkib hissələrindən biri iki ölkə arasında “Sülh Müqaviləsi”nin imzalanması və ratifikasiyasıdır. Onun fikrincə, digər mühüm komponent kommunikasiyaların blokunun açılmasıdır ki, bu da regionda iqtisadi qarşılıqlı asılılıq yaradacaq və öz növbəsində sülhün möhkəmlənməsinə töhfə verəcək.

Ermənistanın Azərbaycanla sülhə sadiqliyini təsdiq edən Birgə Bəyannamənin imzalanmasını mühüm hadisə kimi dəyərləndirən Armen Qriqoryan deyib ki, rəsmi İrəvan suverenlik və ərazi bütövlüyü prinsiplərinə sadiqliyin bir daha təsdiqləyib. Onun sözlərinə görə, MDB-nin təsis sənədi olan 1991-ci il Alma-Ata Bəyannaməsi də bugünkü prosesin əsaslarının formalaşmasında əsas rol oynayıb: "Həmin sənədin əsasında biz əməkdaşlığımızı qurmaqda davam edirik. İndiki şəraitdə Ermənistan və Azərbaycan Alma-Ata Bəyannaməsi əsasında bir-birinin ərazi bütövlüyünə hörmət edirlər. Bu gün Cənubi Qafqaz hərbi münaqişələrin ağır irsindən tədricən qurtulduğu və maraqların toqquşması məntiqindən əməkdaşlıq məntiqinə keçdiyi bir vaxtda dinc və davamlı inkişaf üçün yeni üfüqlər açılır".

Təhlükəsizlik Şurasının katibi kommunikasiyaların açılmasından danışarkən Vaşinqton sazişi və "TRIPP yolu" proqramı çərçivəsində əldə olunmuş razılaşmanı xüsusilə qeyd edib. Onun sözlərinə görə, hazırda Ermənistan ABŞ-la "TRIPP yolu" layihəsinin detallarını fəal şəkildə müzakirə edir və yaxın vaxtlarda praktiki işlərin həyata keçirilməsinə başlamaq mümkün olacaq".

Armen Qriqoryan bildirib ki, bu layihə nəqliyyat və kommunikasiya marşrutlarının rəqabət aləti kimi deyil, əməkdaşlıq və qarşılıqlı rifah mühiti kimi istifadə olunacaq: "Biz təkcə infrastruktur sahəsində deyil, həm də humanitar əlaqələrin və qarşılıqlı etimadın inkişafında müsbət dinamika görürük. Bu prosesin ən mühüm komponentlərindən biri nəqliyyat-kommunikasiya marşrutlarının blokdan çıxarılmasıdır ki, bu da təkcə infrastruktur məsələsi deyil, sabit və uzunmüddətli təhlükəsizliyin təmin edilməsi istiqamətində atılan strateji addımdır. TRIPP proqramı çərçivəsində biz real əməkdaşlıq və qarşılıqlı fayda mühiti yaratmağa çalışırıq. Bu proqram Ermənistanın nəqliyyat marşrutlarının Avrasiya məkanı da daxil olmaqla daha geniş şəbəkələrə inteqrasiyasını təmin etməklə təkcə Ermənistan və Azərbaycan arasında deyil, həm də digər MDB ölkələri ilə əlaqələr yaratmaq məqsədi daşıyır".

Elxan SALAHOV