02.04.2025, 10:14 213
- Ermənistan Kommunist Partiyasının Gümrü meri vəzifəsinə namizədi Vardan Qukasyana aid səs yazısı ilə bağlı cinayət işi açılıb.
"Vətən səsi" xəbər verir ki, bu barədə “Sputnik Ermənistan”a Baş prokurorluqdan məlumat yayıb. Bildirilir ki, martın 26-da internetdə yayılan səs yazısında Vardan Qukasyan müəyyən adamların toplanmasını tələb edib, onları “problemlərlə” hədələyib.
Xatırladaq ki, Ermənistanın İrəvandan sonra ikinci böyük şəhəri sayılan Gümrüdə martın 30-da keçirilən bələdiyyə seçkilərində Baş nazir Nikol Paşinyanın partiyası 36,80 faiz səs toplayaraq birici yeri tutub. Seçkinin nəticələrinə görə, ikinci yerə 20,71 faiz səslə Ermənistan Kommunist Partiyası çıxıb. Lakin hakim partiyanın topladığı səslər Gümrüdə bələdiyyəni formalaşdırmasğa imkan vermir və Paşinyan komandası seçkidə səs çoxluğu qazansa da, digər partiyalar birləşərək onun "güclü rəqibi" rolunda çıxış etməyə başlayıb. Siyasi təhlilçilər bunu Paşinyan komandası üçün sonun başlanğıcı kimi dəyərləndirirlər.
Bildirilir ki, gərgin mübarizəyə və hakimiyyətin repressiya maşınının işə düşməsinə səbəb olan Gümrü və Parkar bələdiyyələrində seçkilərin nəticələri müxalifət düşərgəsində bayram əhvali-ruhiyyəsinə, iqtidarda isə çaxnaşma və narazılıqlara səbəb olub. Hərçənd Gümrü meri namizədlərinin heç biri lazım olan səsi toplaya bilməyib. Çünki qanunvericiliyə əsasən, mer seçilmək üçün 33 səsdən 17-nə sahib olmaq lazımdır. Səs çoxluğu təmin edilmədikdə ən çox mandat alan iki siyasi qüvvə arasında ikinci tur seçkiləri keçirilməlidir. Koalisiya qurulacağı təqdirdə seçkidə ikinci yeri tutan “Kommunist” partiyası digər iddiaçılarla hakim partiyaya qarşı birləşəcək. Bu isə Nikol Paşinyanın komandasının ikinci turda kommunistlərə uduzmasına dair gözləntiləri artırıb. Məhz buna görə, ekspertlər Ermənistanda siyasi böhranın getdikcə dərinləşəcəyini proqnozlaşdırır.
Elxan SALAHOV
