18.11.2024, 11:46 229
- Son günlər saqqalını qırxdığına görə Ermənistan mətbuatında və sosial şəbəklərdə müzakirə obyekti olan Baş nazir Nikol Paşinyan iri ranqlı məmurlardan bir neçəsini istefaya göndərməklə siyasi gündəmi dəyişməyə çalışır. Xüsusilə sosial şəbəkələrin erməni seqmentində saqqalını qırxdıqdan sonra komandasında təmizləmə qərarları verən Paşinyanın siyasi imicini də dəyişməyə başladığı deyilir. Mətbuatda və sosial şəbəkələrdə aparılan lağlağı tənqidlər, yarızarafat müzakirələr hətta o səviyyəyə çatıb ki, Baş nazir istefaya göndərdiyi məmurlarla bağlı erməni xalqına müraciət etməli olub.
"Vətən səsi" xəbər verir ki, Paşinyan sosial şəbəkələr vasitəsilə erməni xalqına ünvanladığı müraciətində yüksək vəzifəli şəxslərin istefalarından bəhs edib: “Əziz həmvətənlər, mətbuatda və sosial şəbəkələrdə gedən kütləvi müzakirələri nəzərə alaraq bildirmək istərdim ki, bir sıra yüksək vəzifəli şəxslərdən vəzifələrini tərk etmələrini xahiş etmişəm. Belə bir xahişlə müraciət etməyimin səbəbləri şəxsi deyil, sistemli xarakter daşıyır ki, bu barədə mən açıq şəkildə demişəm. Eyni zamanda, adları çəkilən şəxslərin dövlətçiliyimizin inkişafındakı xidmətlərini də inkar edə bilmərəm və xahişimi başa düşdüklərinə, töhfə verdiklərinə görə hər kəsə təşəkkür edirəm”.
Xatırladaq ki, Ermənistan KİV-ndə yayılan məlumata görə, daxili işlər naziri Vahe Qazaryan, ərazi idarəetmə və infrastruktur naziri Qnel Sanosyan, İstintaq Komitəsinin sədri Arqişti Kyaramyan və Dövlət Gəlirləri Komitəsinin sədri Rüstəm Badasyan işdən çıxarılıb. Daha sonra Ali Məhkəmənin sədri Karen Andreasyanın istefa ərizəsi yazıdğı açıqlanıb. Ardınca Ermənistan Korrupsiyaya Qarşı Mübarizə Komitəsinin sədri Sasun Xaçatryan da tutduğu vəzifədən istefa ərizəsi yazıb.
Elxan SALAHOV
