• "Münhen Təhlükəsizlik Konfransı çərçivəsində Almaniya Kansleri Olaf Şolzun da iştirakı ilə Azərbaycan və Ermənistan liderlərinin görüşündən sonra sülh prosesinin sürətlənəcəyinə ümidlər artsa da, bu gün İrəvanda baş verənlər təəssüf doğurur. Dağlıq Qarabağda separatizmin baş qaldırmasının ildönümünü qeyd edən ləğv edilmiş “Arsax”ın “rəsmiləri” yenidən üzə çıxıblar. Onlar İrəvanda separatçılar üçün yaradılan siyasi şəraitdən yararlanaraq Azərbaycana qarşı od püskürür, qisas alacaqlarını bildirirlər. Təəssüf ki, Ermənistan rəhbərliyi Azərbaycanı təhdid edən, terrorla hədələyən bu cür revanşist qüvvələri susdurmur. Bu isə sülh prosesinə mənfi təsir göstərir".

Bunu açıqlamasında politoloq Ramiz Alıyev İrəvanda Qarabağdakı erməni separatizminin 36 illiyinin qeyri-rəsmi formada qeyd olunmasına münasibət bildirərkən qeyd edib.

Onun sözlərinə görə, İrəvanda mövcud olmayan “Arsax nümayəndəliyinin” hələ də saxlanması və bu gün erməni separatizminin ildönümü günü orada bəzi tədbirlərin keçirilməsi Ermənistanın baş nazirinin Münhendə sülh çağırışlarına ziddir: “Özünün ərazi bütövlüyünü təmin edən Azərbaycan Cənubi Qafqazda sülh və sabitliyin, əməkdaşlıq mühitinin təmin edilməsi üçün əlindən gələni edir. Bakı sülh müqaviləsi ilə bağlı bütün əhəmiyyətli təşəbbüslərin müəllifidir. Amma etiraf edək ki, sülh müqaviləsinin imzalanması təkcə bir təfərin iradəsindən asılı deyil. Burada hər iki tərəf real addımlar atmalıdır. Ermənistan Azərbaycana qarşı qanunvericilik səviyyəsində iddialarından əl çəkməli və mövcud olmayan separatçı rejimin simvollarını birdəfəlik kənara atmalıdır. Bu ölkənin müstəqillik bəyannamsəində, konstitusiyasında Azərbaycan və Türkiyəyə qarşı ərazi iddaları qalmaqdadır. İrəvan bu kimi problemləri həll etməlidir”.

Politoloq bildirib ki, ləğv edilmiş separatçı rejimin son başçısı Samvel Şahramanyan uzun fasiələdən sonra “silahdaşları” ilə birlikdə erməni separatizminin 36-cı ildönümünü qeyd etmək üçün “Yerablur” qəbiristanlığına gedib: “Həmçinin İrəvanda separatçılar bir neçə tədbir də keçirinblər. Doğrudur, Ermənistan rəsmilərindən heç kəs onların tədbirlərinə qatılmayıb. Amma Azərbaycan dövlətinin, suverenliyinin əleyhinə yönəlmiş bu kimi tədbirlərin keçirilməsinə icazənin verilməsi ciddi suallar doğurur. Xarici səfərlərində, müsahibələrində özünü aşırı sülhpərvər baş nazir kimi göstərən Nikol Paşinyan nədənsə öz ölkəsi daxilində sülhə mane olan ünsürlərə qarşı mübarizə aparmır. Bir müddət öncə şərti sərhəddə baş verən təxribatın ardınca bu gün İrəvanda separatçıların öz “yubleylərini” qeyd etməsi Ermənistanın Azərbaycanla münasibətləri normallaşdırmaqda maraqlı olmamasından xəbər verir. Təbii ki, sülh müqaviləsinin bağlanması Azərbaycandan çox Ermənistana lazımdır. Müharibədə uduzan, kapitulyasiya aktına imza atan, ordusu darmadağın edilən tərəf onlardır. Bu gün Azərbaycan Silahlı Qüvvələri regionda ən güclü ordulardan hesab olunur. Ordumuzun dəf edə bilməyəcəyi maneə, həyata keçirə bilməyəcəyi hücum əməliyyatı yoxdur. İqtisadi inkişaf tempinə görə də Azərbaycan regiondakı dövlətlərdən öndədir. Ermənistanda isə bütün bunların əksi baş verir. Ona görə də Paşinyan komandası ciddi şəkildə düşünməlidir. Onlar çox yanlış olaraq, xaricdəki havadarlarınına arxayın olub nə vaxtsa, Azərbaycana qarşı ərazi iddialarını gerçəkləşdirə biləcəklərini düşünürlər. İstənilən təxribat xarakterli addım Ermənistana baha başa gələcək”.

R.Alıyev qeyd edib ki, Ermənistan Azərbaycanın sülh təkliflərini sözdə qəbul etsə də, real addımlar atmağa tələsmir: “Görünür, onlar Qərbdəki hamilərindən göstəriş gözləyirlər. Bəzi Qərb dövlərləri Cənubi Qafqazda sülh və sabitliyin olmasında maraqlı deyillər. İran, Rusiya, Türkiyə və Azərbaycan sərhədləri yaxında münaqişə ocaqlarını yaratmaq və alovlandırmaqla özlərinin çirkin maraqlarını burada həyata keçirmək istəyirlər”. (APA)