14.07.2023, 11:35 269
- Xankəndidəki qanunsuz rejimin “təhlükəsizlik şurasının keçmiş katibi” Vitali Balasanyanın həbs səbəbi məlum olub.
Vəkili Rafael Martirosyan deyib ki, Balasanyan “hakimiyyət nümayəndəsini” zorakılıqla hədələdiyi üçün saxlanılıb.
“Balasanyan “xidmət orqanının nümayəndəsinə” və ya onun yaxın qohumuna “xidməti vəzifələrinin icrası” zamanı zor tətbiq etmə hədəsi ilə ittiham olunur. Saxlanıldıqdan sonra ona bədən xəsarətləri yetirilib. Balasanyanla birlikdə onun oğlu, əmisi oğlu və qardaşı oğlu da saxlanılıb”, - o bildirib.
Qeyd edək ki, həbsdən əvvəl qondarma rejimin “milli təhlükəsizlik xidmətinin” əməkdaşları Balasanyanın mənzilində 40 dəqiqə axtarış aparıblar. Onun oğlu isə 2021-ci ildə arıxanalar almaq üçün 74,5 milyon dram (187 min dollar) “dövlət krediti” almaqda, lakin şərtləri yerinə yetirməyərək “dövlətə” ziyan vurmaqda ittiham olunur.
Xatırladaq ki, Azərbaycanın Əsgəran yaşayış məskənində Qarabağdakı qondarma rejimin "təhlükəsizlik şurası"nın keçmiş katibi, general Vitali Balasanyan və oğlu Artur dünən öz evində saxlanılıb. Onun evində 40 dəqiqə axtarış aparıldıqdan sonra ata-oğul qondarma "xüsusi xidmət orqanları" tərəfindən aparılıb.
Vitali Balasanyan külli miqdarda çirkli pulların yuyulmasında ittiham olunur. “Aravot” nəşri bununla bağlı daha bir neçə nəfərin də (Balasanyanın qardaşı və qardaşı oğlu) saxlanıldığını yazıb. (Trend)
