• Qırx dörd günlük müharibədən sonra revanşist əhval-ruhiyyəli separatçıları ətrafına toplayaraq İrəvanda Paşinyan hökumətinə qarşı aramsız etiraz aksiyaları keçirən, işğaldan azad olunmuş Azərbaycan torpaqlarını geri alınmasını tələb edən və bu cür qanunsuz hərəkətlərinə görə hazırda həbsdə olan erməni keşişin cinayət işi ağırlaşdırıla bilər.

"Vətən səsi" xəbər verir ki, bu barədə Ermənistan mətbuatı məlumat yayıb. Bildirilir ki, Ermənistanın Baş Prokurorluğu keşiş Baqrat Qalstanyanın kilsədəki tərəfdarların vasitəsilə Baş nazir Nikol Paşinyanı hakimiyyətdən devirmək üçün yeni planlar hazırladığını açıqlayıb.  Xüsusi xidmət orqanları daxil olmuş məlumatlar əsasında öyrənib ki, Qalstanyan kilsədəki tərəfdarlarına sifariş göndərərək onları hökumət əleyhinə ixtişaşlara səsləyib. Həyata keçirilən istintaq tədbirləri zamanı həbsdə olan keşişin kilsə daxilindəki tərəfdarları, habelə katolikos II Qareginlə gizli əlaqədə olduğu təsdini tapıb.

“Joqovurd” qəzetinin yaydığı məlumata görə, artıq hüquq-mühafizə və prokurorluq orqanları işin üstünü açdıqdan sonra Baqrat Qalstanyanın azadlıqdakı tərəfdarlarını və onun sifarişlərini kilsə rəhbərliyinə çatdıran şəxsləri nəzarətə götürüb. Nəşr hökumətdəki mənbələrinə istinadən yazır ki, Nikol Paşinyan onun komandasına qarşı yönəlmiş bu cür addımları kökündən həll etmək üçün xüsusi tapşırıq verib. Hətta Baş nazirin göstərişi əsasında kilsə daxilində katolikos II Qareginə qarşı üsyan hazırlandığı da iddia edilir.

Baş nazirin yaxın çevrəsindən nəşrə bildirilib ki, artıq kilsə daxilində onların tapşırıqlarını yerinə yetirəcək qrup formalaşıb. Mənbə həmin qrupun əsas hədəfinin katolikosun yaxın ətrafında II Qareginə qarşı narazılıq yaratmaq olduğunu qeyd edib: "Hakimiyyətdəki mənbələrimizin sözlərinə görə, məqsəd katolikosun ətrafında üsyan yetişdirmək və onu iqamətgahını tərk etməyə məcbur etməkdir. Çünki Baş prokuroru Anna Vardapetyan deyib ki, arxiyepiskop Baqrat Qalstanyan və onun tərəfdarlarının hakimiyyəti zorla ələ keçirmək və terror aktı həyata keçirmək planlarının olduğunu əvvəllər də bir neçə dəfə bəyan edib. Qalstanyan həbs edilməsindən sonra da onun tərəfdarları vasitəsilə çevrilişə cəhd etməsinə dair informasiyalar bitib-tükənmir. İndi isə hökumət "qanunsuz hərəkətlərə yol verən qüvvələrin zərərsizləşdirilməsi" adı altında sərt addımlar atmağa başlayıb. Hətta Qalstanyanın cinayət işi üzrə aparılan istintaqın izi katolikos II Qareginə uzanır. Bu o deməkdir ki, kilsəyə qarşı təzyiq və təqiblərin artması fonunda yüksək vəzifəli din adamlarının həbs olunması da gözləniləndir. Nikol Paşinyanın özü də əmindir ki, yaxın vaxtlarda daha güclü təzyiqlər olacaq və tezliklə istədikləri nəticəni əldə edəcəklər".

Xatırladaq ki, ötən ilin aprelindən Ermənistanda siyasi gündəmi qəsb edən arxiyepiskop Baqrat Qalstanyan iyunun ortalarınadək İrəvanda və Tavuş vilayətində keçirilən etiraz aksiyalarının təşkilatçısı kimi tanınır. O, beş ay əvvəl, iyunun 24-də dövlət çevrilişinə hazırlıq barədə bəyanatla çıxış etmişdi. Bundan sonra Baş Prokurorluğun təqdimatı əsasında haqqında cinayət işi başlamış Qalstanyanı Şirak yeparxiyasının başçısı, arxiyepiskop M.Acapaxyanla birlikdə həbs olunu. Məhkəmənin qərarı əsasında onların hər ikisi barədə iki aylıq həbs-qəti imkan tədbiri seçilib. İstintaqın gedişi prosesində kilsə daxilində vəzifə və nefuz sahibi olan daha bir neçə şəfərin bu işdə iştirak etdiyi məlum olduqdan sonra həbs dalğası genişlənib.

Ermənistan mətbuatı Paşinyan-kilsə davasını təkcə hakimiyyətə qarşı müxalifətdə olan liderlərin hakimiyyət savaşı deyil, həm də revanşist qüvvələrin əsas hərəkətverici qüvvəsi olan dindarların payız imtahanı kimi xarakterizə edir. Bildirilir ki, hələ seçkilərə yarım ildən çox vaxt qaldığı şəraitdə ölkədə həbs dalğasının genişlənməsi hazırkı hakimiyyətə müxalif olan qüvvələri ciddi şəkildə parçalaya bilib. Son bir neçə ayda baş verən hadisələr isə müxalifətin real gücünün son dərəcə zəif olmasının göstəricisi kimi ortadadır.

Elxan SALAHOV