20.11.2025, 11:10 220
- Səhiyyə Nazirliyi və Akademik Zərifə Əliyeva adına Milli Oftalmologiya Mərkəzinin birgə təşəbbüsü ilə Avtomobil Səyyar Klinikası Xocalı rayonunda tibbi aksiya keçirir.
Aksiya 20-21 noyabrı əhatə edir.
Aksiyanın məqsədi azad edilmiş ərazilərdə yaşayan əhalinin keyfiyyətli oftalmoloji xidmətlərə əlçatanlığını artırmaq və göz sağlamlığının qorunmasına dəstək verməkdir. Aksiya müddətində sakinlər üçün geniş oftalmoloji müayinələr aparılacaq, görmə problemləri erkən aşkarlanacaq və mümkün olduqda ilkin tibbi yardım göstəriləcək. Müayinələr nəticəsində ciddi patologiyalar aşkarlanarsa, həmin vətəndaşların daha ətraflı diaqnostika və müalicəsi üçün Akademik Zərifə Əliyeva adına Milli Oftalmologiya Mərkəzinə yönləndirilməsi təmin olunacaq.
Müasir diaqnostik və cərrahi avadanlıqlarla təchiz olunan Avtomobil Səyyar Klinikası 2005-ci ildən fəaliyyət göstərir. Bu klinikanın yaradılmasında əsas məqsəd əhalinin vaxt itirmədən, yaşadığı bölgələrdə keyfiyyətli tibbi xidmətlərdən faydalanmasına şərait yaratmaqdır.
Akademik Zərifə Əliyeva adına Milli Oftalmologiya Mərkəzi illərdir ölkənin müxtəlif regionlarında humanitar tibbi aksiyalar həyata keçirir və bu tədbirlərin sayı ildən-ilə artır. Mərkəzin bütün filialları ən müasir texnologiyalarla təmin olunub, burada təcrübəli və beynəlxalq təlimlər keçən həkim-oftalmoloqlar fəaliyyət göstərirlər. Bundan əlavə, səyyar xidmətlərin daha da genişləndirilməsi məqsədilə 2018-ci ildən etibarən Dəmiryolu Səyyar Klinikası da əhaliyə xidmət göstərməyə başlayıb.
Qeyd edək ki, müayinələrdən faydalanmaq istəyən sakinlər (+994 50) 891 94 51, (012) 568 28 90 nömrəli telefonlara zəng edə bilərlər. (AZƏRTAC)
