• İki gün əvvəl işğaldan azad olunmasının beşinci ildönümü qeyd edilən Kəlbəcər şəhərinin bərpası çərçivəsində faktiki və qarşıdakı bir neçə il ərzində görüləcək işlərin siyahısı açıqlanıb.

"Vətən səsi"nin indiyədək həyata keçirilmiş və gələn ilin sonunadək icrası davam edəcək yenidənqurma layihələri əsasında apardığı araşdırmalardan məlum olur ki, Azərbaycan dövlətinin yalnız özünün maliyyə resursları hesabına sıfırdan qurduğu şəhər və kəndlər arasında Kəlbəcərin bərpasına xüsusi diqqət yetirilir.  Belə ki, "Böyük Qayıdış" proqramı çərçivəsində Kəlbəcər şəhərində birinci mərhələ üzrə 10 mindən çox məcburi köçkünün daimi məskunlaşması üçün 4 yaşayış kompleksinin inşası nəzərdə tutulur. Hazırda genişmiqyaslı bərpa və quruculuq işlərinin aparıldığı rayon mərkəzi dünyanın ən gözəl şəhərlərindən birinə cevrilir. Artıq birinci yaşayış kompleksinin ərazisində fərdi və çoxmərtəbəli evlərə köçən sakinlərin rahatlığı təmin edilib. Burada işıq, su, təbii qaz çəkilib, yollar salınıb, minalardan təmizləmə işi aparılıb.

Prezident İlham Əliyev tərəfindən Kəlbəcər şəhərində ikinci, üçüncü və dördüncü yaşayış komplekslərinin təməli qoyulub. Ötən il sentyabrın 2-də təməli qoyulmuş ikinci yaşayış kompleksi 1,76 hektar ərazidə layihələndirilib. Şəhərin Baş planına əsasən çoxfunksiyalı zonada yerləşən kompleksdə 3 və 5 mərtəbəli 8 yaşayış binasının inşası nəzərdə tutulur. Mənzillərin 56-sı ikiotaqlı, 56-sı üçotaqlı, 48-i isə dördotaqlı olacaq. Burada ümumilikdə 160 ailənin yaşaması planlaşdırılır. Bu yaşayış kompleksində əhalinin məşğulluğunun və istirahətinin təmin edilməsi üçün hər cür şərait yaradılacaq, geniş abadlıq və yaşıllaşdırma işləri görüləcək. Ərazidəki bütün binaların, fərdi yaşayış evləri və küçələrin işıqlandırılmasında yaşıl enerjidən istifadə olunacaq.

Ümumi ərazisi 7,6 hektar olan üçüncü yaşayış kompleksində 4 və 5 mərtəbəli 29 bina tikiləcək. Kompleksdə 476 mənzilin inşası planlaşdırılıb ki, onlardan da 8-i birotaqlı, 176-sı ikiotaqlı, 169-u üçotaqlı, 123-ü isə dördotaqlı olacaq. Buraya köçürüləcək ailələrin rahatlığı və məişət məsələlərinin həlli üçün kompleksdə bütün zəruri infrastruktur qurulacaq. Belə ki, burada məişət və ticarət obyektləri, futbol meydançası, istirahət guşələri, söhbətgahlar, uşaq oyun meydançaları, velosiped yolları, yerüstü avtomobil dayanacağı yaradılacaq. Binalar daimi su, elektrik təchizatı və yüksəksürətli internetlə təmin ediləcək. Ərazidə geniş abadlıq və yaşıllıq işləri görüləcək.

Kəlbəcər şəhərində 807 ailənin köçürülməsi nəzərdə tutulan dördüncü yaşayış kompleksində isə 128-i birotaqlı, 304-ü ikiotaqlı, 293-ü üçotaqlı, 82-si dördotaqlı olmaqla ümumilikdə 807 mənzil inşa ediləcək. Burada 4 mərtəbəli 26 binanın inşası planlaşdırılır. Ümumi ərazisi 10 hektara yaxın olan kompleksdəki binaların 1-ci mərtəbəsində məişət və ticarət obyektləri yaradılacaq. Yaşayış kompleksində sakinlərin rahatlığı və asudə vaxtlarının səmərəli təşkili üçün idman meydançaları, velosiped yolları salınacaq, istirahət guşələri, söhbətgahlar, uşaqlar üçün oyun guşələri inşa olunacaq. Binaların hamısı daimi su, elektrik enerjisi və yüksəksürətli internetlə təchiz ediləcək. Ərazidə, həmçinin geniş miqyasda yaşıllıq zonalarının salınması nəzərdə tutulur.

Xatırladaq ki, indiyədək Kəlbəcər şəhərinə iki mərhələdə 101 məcburi köçkün ailəsi köçürülərək doğma yurdunda yeni mənzillərlə təmin olunub. Noyabrın 26-na təsadüf edən sonuncu köç zamanı 112 nəfərdən ibarət 27 ailəyə doğma şəhərinə köçürülüb.

Elxan SALAHOV