26.04.2023, 11:36
- "Hraparak" yazır ki, 5 il öncə Gümrüdən başlanan yürüş İrəvanda böyük coşqu ilə qarşılandı. Paşinyanı və onun komandasını xalqın xilaskarı kimi qəbul edən kütlənin dəstəyi ilə Serj Sarkisyan istefa verməyə məcbur oldu. Paşinyanın xalqa müraciətində tez-tez işlətdiyi "Ermənistan Respublikasının xalqı, mən sənin qadan alım" ifadəsi isə artıq lətifəyə dönüb. Belə ki, o, xalqın qadasını nə aldı, nə də azaltdı, əksinə, xalq yeni problemlərlə yaşamağa alışmaqla onu yenidən özünə rəhbər seçdi.
Milli özünütəyin İttifaqının lideri Paruyr Hayrikyan həmin dövrü xarakterizə edərkən deyib ki, 5 il öncə Paşinyanı dəstəklədiyinə görə peşman deyil.
O vaxt bəzi yazarların onun haqqında qəzetlərdə çox təhqiramiz ifadələr işlətdiyini xatırladan P.Hayrikyan əlavə edib ki, Serj Sarkisyan hakimiyyətə saxta yollarla gəlmişdi və onun uzaqlaşdırılması labüd idi.
Yerigəlmişkən qeyd etməyə dəyər ki, 1988-ci ilin fevralında açıq fəaliyyətə keçən erməni separatçılarının düzgün yol sevmədiyini, iki qonşu xalqın əbədi düşmənə çevriləcəyini vurğulayan P.Hayrikyan belə bir təklif irəli sürmüşdü ki, üç Qafqaz Respublikası SSRİ tərkibindən çıxıb aralarında olan məsələləri masa ətrafında özləri həll etsinlər. Həmin vaxt İrəvanda ona qarşı saxta cinayət işi başlandı, bir neçə aylıq həbsdən azad ediləndən sonra isə bir neçə il Fransada yaşamağa məcbur oldu.
Yazılı və şifahi çıxışlarında, müsahibələrində Sumqayıt hadisələrini SSRİ xüsusi xidmət orqanlarının təşkil etdiyini vurğulayan P.Hayrikyan bu gün də öz mövqeyində qaldığını, iki qonşu xalqı düşmən edənlərin daim lənətlənəcəyini bildirir.
“Hraparak"ın müxbiri Suzan Simonyana verdiyi müsahibədə "bütün siyasi sahədə dəlmə-deşik professorlar, dediyi başa düşülməyən ekspertlərdən korluq çəkmirik. Mən isə səssizlik içindəyəm", - deyən P.Hayrikyan Paşinyanın bu 5 ildə xalqa yalnız yalanlar danışdığını açıqlayıb.
Nikol Paşinyanın 5 il öncə çəkdirdiyi şəkli məqaləsinə əlavə edən Suzan Simonyan ölkəsini yaxşı heç nəyin gözləmədiyini isə sətiraltı məntiqlə dəfələrlə diqqətə çatdırıb.
