Muzeyin elmi işlər üzrə direktor müavini, tarix elmləri doktoru, dosent Fərhad Cabbarovun mətbuata verdiyi məlumata görə, bundan əvvəl ekspozisiya Azərbaycan Xalq Cümhuriyyəti (1918-1920) dövrü ilə yekunlaşırdı. Hazırda isə ən yeni tariximizi də əhatə edən bölmələr yaradılır.
Ekspozisiyanın bir bölməsi Ulu öndərin liderlik fəaliyyətinin 1969-1982-ci illərə aid dövrünə həsr edilib. Bu bölmədə Ümummilli liderin 1969-cu ildə Azərbaycan Kommunist Partiyası Mərkəzi Komitəsinin birinci katibi seçildiyi plenumun stenoqramı və qərarının surəti yer alır. Həmçinin, dahi şəxiyyətin hakimiyətdə olduğu birinci dönəmdə sosial-iqtisadi həyatda baş verən mühüm hadisələrə aid foto, sənəd və başqa nümunələr sərgilənir. Həmin dövrdə mədəniyyətin inkişafını əks etdirən bölmədə isə teatr, kino, musiqi, rəssamlıq və s. sahələrlə bağlı eksponatlar əksini tapacaq.
Heydər Əliyevin 1993-2003-cü illərdə müstəqil Azərbaycanın Prezidenti olduğu dövrə isə bir salon ayrılıb. Burada ölkənin həmin dövrdə ictimai, siyasi, iqtisadi, mədəni həyatına işıq salan eksponatlar nümayiş etdirilir. 1993 və 1995-ci illərdə tədavülə buraxılmış Azərbaycan manatı, müstəqil Azərbaycanın ilk konistitusiyası, “Əsrin müqaviləsi”nin imzalanması ilə bağlı bir neçə eksponat da sərgilənir. “Əsrin müqaviləsi”ni icra edən rəhbər komitənin ilk iclası Tarix Muzeyinin binasında keçirilib və Heydər Əliyev şəxsən özü burada iştirak edib.
F.Cabbarov onu da bildirib ki, salonda quraşdırılmış xüsusi ekranda müasir tariximizin əsas hadisələrinin görüntüləri Azərbaycan və ingilis dillərində mətnlərlə əks olunacaq. Ulu öndərin daxili və xarici səfərlərində çəkilmiş fotoşəkillərdən ibarət stendlər də qurulacaq.
Başqa bir salon isə ümummilli liderin layiqli davamçısı Prezident İlham Əliyevə və 44 günlük Vətən müharibəsindəki Böyük Zəfərə həsr edilib.
Muzeydə yeni bölmələrin yaradılması sentyabrda tamamlanacaq.
Hazırladı: Mina RƏŞİD