10.09.2025, 17:42 8
- AMEA-nın akademik Z.M.Bünyadov adına Şərqşünaslıq İnstitutunun elmi işçisi Hilal Ağamoğlanovun “İrəvanlı alimlər nəsli və sufi baxışları: Əbdülkərim İrəvaninin həyatı və mirası” adlı məqaləsi Türkiyə Cümhuriyyətinin ERİH PLUS elmi bazasına daxil olan nüfuzlu “Akademik Tarih ve Düşünce Dergisi”nin 12-ci (4) nömrəsində ingilis dilində dərc olunaraq beynəlxalq elmi ictimaiyyətə təqdim olunub.
Bu barədə Şərqşünaslıq İnstitutundan bildirilib.
Məqalədə Qərbi Azərbaycandakı İslam alimlərinin bölgənin dini-ictimai həyatının formalaşmasındakı iştirakı araşdırılıb, bir irəvanlı alimlər nəslinə xüsusi diqqət ayrılıb. Bu ailə bölgənin dini, ictimai və mədəni tarixinin əhəmiyyətli bir parçasını meydana gətirən İslam alimlərindən formalaşıb. Nəsil 1720-ci ildə doğulan Mirzə Məhəmməd İrəvani ilə başlamış, oğlu Mirzə Əbul-Qasim İrəvani (1773), nəvəsi Mirzə Əbdülkərim İrəvani (H. 1220-1294 / M. 1806-1877) və sonrakı nəsillərlə davam edib, nəslin üzvlərinin əksəriyyəti də İslam alimləri olub.
Araşdırma Əbdülkərim İrəvaninin təsəvvüf düşüncəsinə sahib olduğunu göstərməkdədir. Xüsusilə Nemətullahi təriqəti şeyxləri olmaqla dövrünün öndə gələn sufi şəxsiyyətləri ilə olan əlaqəsi, dərvişlərə göstərdiyi hörmət və əhəmiyyətli sufilərin dəfn edildiyi “Mollabaşı” türbəsini tikdirməsi bu nəticəni dəstəkləməkdədir.
Həmçinin məqalədə onun sələf və xələflərinin fəaliyyətləri nəzərdən keçirilib. (AZƏRTAC)
