18.11.2024, 20:59 123
- COP29 konfransı təkcə təşkilatçılıq baxımından deyil, həm də qlobal miqyasda iştirakçıların müxtəlifliyi və müzakirələrin konstruktivliyi ilə seçilir. Bu tədbirin yüksək səviyyədə təşkili təqdirəlayiqdir. İştirakçılar arasında rahatlıq və məmnuniyyət hissi hakimdir, bu da konfransın ümumi mühitinə müsbət təsir edir.
Bu sözləri açıqlamasında COP29-un Toqodan olan iştirakçısı Koku Selom Agbavito bildirib.
“Vətəndaş cəmiyyəti nümayəndələri olaraq bu müzakirələrdə fəal iştirak etməyimiz zəruridir. Düşünürəm ki, COP29 digərlərindən fərqli olaraq, istər qadınların, istərsə də yerli icmaların səsi olmaq üçün əhəmiyyətli platformaya çevrilib. Mən özüm də yerli icmalarla və qadınlarla çalışaraq onların fikirlərini və təkliflərini təqdim etməyə çalışıram. Bu, mənim üçün böyük məsuliyyətdir və Azərbaycan bu istiqamətdə qlobal diqqətə layiq nümunə ortaya qoyur”, - deyə o əlavə edib.
Növbəti illər üçün planlara toxunan Koku Selom Agbavito qeyd edib: “COP-un təcrübəsi sübut edir ki, düzgün təşkilatlanma və inklüziv yanaşma ilə daha böyük nailiyyətlərə imza atmaq mümkündür. Mən inanıram ki, COP29 qlobal iqlim dəyişikliyi məsələlərinin həlli yolunda ən uğurlu konfranslardan biri olacaq və gələcək COP-lar üçün model rolunu oynayacaq. Azərbaycan hökumətinə və təşkilatçılara təşəkkür edirəm ki, belə beynəlxalq səviyyəli tədbiri həyata keçirməklə bu uğuru mümkün etdilər”. (AZERTAC)
