• Yusifin atası da müharibə iştirakçısı olub. O, Birinci Qarabağ Müharibəsinin qazisidi. Ümumiyyətlə, onların ailəsində, doğmaları arasında müharibə iştirakçısı çoxdur. Yusif belə bir ailədə böyüyüb və düşməndən intiqam almaq hissi ilə illərdi Şanlı Vətən Müharibəsinin başlanmasını gözləmişdi. Gizir Yusif Ələsgərov qəhrəman tankçı idi, o döyüşlərdə həmişə irəlidə gedirdi. Dəfələrlə onun tankı vurulsa da, özü yaralansa da döyüş yolundan geri dönmədi. Bir dəfə ağır yaralandıqdan sonra müalicəsini belə yarımçıq qoyub döyüşlərə, həmişə düşündüyü igid yoldaşlarının yanına qayıtdı. Elə bu müqəddəs amalı uğrunda da qəhrəmancasına şəhadətə ucaldı. Bu gün atası, babası, əmisi, doğmaları və bütün el-oba onun igidliyindən ağızdolusu danışır. “Döyüşdə qorxu nədi, heç geriyə baxmaq da yoxdu”, - deyən gizir düşmən əsgərlərini özü dediyi kimi, ot kimi biçərək irəli gedirmiş...

Bu gün Şanlı Vətən Müharibəsinin qəhrəman şəhidi, tankçı, gizir Yusif Yaşar oğlu Ələsgərovun doğum günüdür. O, 1996-ci il oktyabrın 14-də Tovuz rayonunun Yuxarı Öysüzlü kəndində anadan olub. 2002-2013-cü illərdə M.Məmmədov adına Yuxarı Öysüzlü kənd tam orta məktəbində təhsil alıb. Yusif Ələsgərov 2014-cü ildə müddətli həqiqi hərbi xidmətə çağırılıb. 2014-2016-cı illərdə Daxili Qoşunların "N" saylı hərbi hissəsində xidmət edib. 2017-ci ildən Azərbaycan Silahlı Qüvvələrinin "N" saylı hərbi hissəsində müddətdən artıq həqiqi xidmət hərbi qulluqçusu kimi Vətənə xidmət edirdi.
Azərbaycan Ordusunun əsgəri olan Yusif Ələsgərov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Füzuli, Xocavənd, Cəbrayıl və Qubadlının azadlığı uğrunda gedən döyüşlərdə tankçı kimi iştirak edərək şücaətlər göstərib. Oktyabrın 24-də gizir Qubadlı döyüşləri zamanı ağır yaralanıb. O, müalicəsi başa çatmamış yenidən döyüşlərə qatılıb.

Yusif Ələsgərov noyabrın 7-də Xocavənd rayonu istiqamətində gedən döyüşlərdə qəhrəmancasına şəhadətə ucalıb. Şəhidimiz doğma Tovuz rayonunun Yuxarı Öysüzlü kəndində böyük izdiham və ehtiramla torpağa tapşırılıb.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin müvafiq sərəncamlarına əsasən Yusif Ələsgərov ölümündən sonra "Vətən uğrunda", "Xocavəndin azad olunmasına görə", "Şuşanın azad olunmasına görə", "Cəbrayılın azad olunmasına görə", "Füzulinin azad olunmasına görə" və “İgidliyə görə" medalları ilə təltif edilib.

Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!

Mina RƏŞİD