29.10.2025, 10:51 231
- Ötən il ölkəmiz COP29-a uğurla ev sahibliyi etdi. COP29 bir daha göstərdi ki, iqlim məsələləri dövlətimiz üçün ən vacib və prioritet məsələlərdəndir.
Bu sözləri xarici işlər nazirinin müavini Yalçın Rəfiyev 13-cü Beynəlxalq “Caspian Energy Forum”da çıxışı zamanı deyib.
O bildirib ki, COP29 substantiv yekunlar və əldə edilmiş qərarların əhəmiyyəti və sayı baxımından iqlim danışıqları tarixində ən uğurlu COP-lardan biri hesab olunur.
“2030-cu ilədək qlobal bərpaolunan enerji gücünün ən azı 11 min giqavata qədər 3 qat artırılması və enerji səmərəliliyinin 2 faizdən 4 faizə ikiqat artırılması məqsədlərinə praktiki töhfə vermək üçün COP29 çərçivəsində enerji sahəsində üç istiqamətdə töhfəmiz irəli sürüldü. Bunlardan biri COP29 qlobal enerji saxlancı və şəbəkələri vədi; İkinci COP29 yaşıl enerji vədi, yaşıl enerji zonaları və dəhlizləri; Üçüncü COP29 hidrogen bəyənnaməsi təşəbbüsləri olub. Bu təşəbbüslər indiyə qədər bir çox dövlətlərin dəstəyini qazanıb”,- deyə Y.Rəfiyev qeyd edib.
O diqqətə çatdırıb ki, Azərbaycan regionun yeni enerji xəritəsinin formalaşmasında həm istehsalçı, həm də transit ölkə kimi mühüm rol oynayır. Onun sözlərinə görə, Azərbaycan, Qazaxıstan, Özbəkistan və Qara dəniz hövzəsi ölkələri artıq yeni enerji xəritəsinin formalaşmasında mühüm oyunçulara çevrilirlər: "Azərbaycan bu prosesdə həm istehsalçı, həm də transit ölkə kimi önəmli rol oynayır. Qarabağ və Şərqi Zəngəzurda həyata keçirilən bərpaolunan enerji layihələri, eləcə də Xəzər dənizindəki külək potensialının reallaşdırılması ölkəmizi regionun yaşıl enerji mərkəzinə çevirir. Biz bərpaolunan enerji gücünə dair hədəflərimizə çatmaq üçün beynəlxalq tərəfdaşlarımızla sıx əməkdaşlıq aparırıq. İqlimə uyğunlaşma sahəsində su ehtiyatlarını idarə edilməsi, kənd təsərrüfatında iqlim dayanıqlığı və ekosistemlərin bərpası üzrə layihələr regionun iqlim risklərinə qarşı davamlılığını gücəndirir”. (AZƏRTAC)
