27.11.2025, 13:21 222
- "Avropa İttifaqı Transxəzər marşrutuna həmişə bir xətt deyil, şəbəkə kimi baxıb. Bu kontekstdə Zəngəzur dəhlizi şəffaf və əməkdaşlıq ruhunda inkişaf edərsə, mövcud əlaqələri tamamlaya bilər".
"Vətən səsi" xəbər verir ki, bunu Özbəkistan mətbuatına müsahibəsində Avropa Komissiyasının komissarı Jozef Sikela deyib. O qeyd edib ki, Zəngəzur dəhlizinin potensialı əlavə tranzit variantının təklif edilməsində, mövcud marşrutlarda tıxacın azaldılması və regional ticarətin ümumi dayanıqlığının artırılmasındadır. Onun sözlərinə görə, ABŞ administarsaiyasının da dəstəklədiyi bu nəhəng nəqliyyat dəhlizi layihəsi Özbəkistan aid olduğu Mərkəzi Asiya regionunun gələcək inkişafına mühüm töhfələr verə bilər: "Mərkəzi Asiya üçün daha çox marşrut seçimi daha böyük sabitlik və qlobal bazarlara daha rəqabətli çıxış deməkdir".
Jozef Sikela Mərkəzi Asiya dövlət başçılarının məşvərət görüşündən sonra Azərbaycanın bu formatın tamhüquqlu iştirakçısına çevrilməsi ilə bağlı suala da cavab verib. Onun sözlərinə görə, Cənubi Qafqazın digər ölkələrinin də bu formata cəlb ediləcəyi ehtimalı yüksəkdir: "Mərkəzi Asiya və Cənubi Qafqaz arasında daha sıx koordinasiya strateji əhəmiyyət kəsb edir. Bu cür əlaqələr Avropa İttifaqının yeni Qara Dəniz Strategiyasının gündəliyinə tam uyğundur. Prosedur, standart və rəqəmsal sistemlərin daha yaxşı uyğunlaşdırılması Transxəzər marşrutunu biznes üçün daha sürətli və proqnozlaşdırıla bilən hala gətirərdi. Bu, həmçinin logistika, liman infrastrukturu, ticarətin asanlaşdırılması və yaşıl nəqliyyatda birgə layihələr üçün yeni imkanlar yaradacaq. Avropa üçün bu, daha etibarlı və çoxşaxəli Şərq-Qərb əlaqələri, region üçün daha güclü iqtisadi əlaqələr və daha böyük sabitlik deməkdir".
Elxan SALAHOV
