30.09.2025, 10:16 238
- "Amerika hökumətinin nümayəndələri ilə "Tramp yolu" layihəsi barədə müzakirələr davam edir. Hazırda müzakirələr həm onlayn, həm də canlı görüşlər vasitəsilə aparılır".
"Vətən səsi" xəbər verir ki, bunu Ermənistanın hakim partiyasından olan deputat Vaqarşak Akopyan bildirib. Erməni deputat qeyd edib ki, İrəvanla Vaşinqton arasında danışıqlarda “Tramp yolu” və ya Zəngəzur dəhlizində hansı biznes modelinin fəaliyyət göstərəcəyi də müzakirə olunur: “Amerikalılarla həm onlayn, həm də üzbəüz görüşlərdə çox fəal işləyirik. Bununla bağlı işçi qrupu da yaradılıb. Bu, başlanmış bir prosesdir, amma hazırda bu barədə ətraflı məlumat vermək səlahiyyətinə malik deyiləm. Yalnız onu deyə bilərəm ki, “Tramp yolu”nun açılması ilə bağlı fəal iş gedir".
Xatırladaq ki, avqustun 8-də ABŞ, Azərbaycan və Ermənistan liderləri arasında Vaşinqtonda əldə edilmi. razılaşmalardan sonra Zəngəzur dəhlizi ilə bağlı danışıqlar aktiv mərhələ daxil olub. Vaşinqton görüşündən bir qədər sonra ABŞ nümayəndə heyəti razılaşmaların həyata keçirilməsi prosesini izləmək üçün Ermənistana səfər edib. Səfər zamanı "Tramp yolu" və ya qısaca olaraq "TRIPP layihəsi" adlandırılan nəqliyyat dəhlizinə dair işlərlə məşğul olan işçi qrupla müzakirələr aparılıb.
Həmin görüşlərdə Ermənistanın Sünik bölgəsindən (Qərbi Zəngəzur - red.) keçən yolun ABŞ şirkətinə uzunmüddətli icarəyə verilməsi də nəzərdən keçirilib. Lakin müzakirələrdə bir qayda olaraq qapalı formatda keçirildiyindən dəhlizə nəzarət mexanizmləri və icarənin şərtləri barədə nələrin danışıldığı açıqlanmır. Bəlli olan odur ki, ABŞ və Ermənistan arasında müxtəlif səviyyədə və formatlarda davam görüşlərin əsas gündəminə Zəngəzur dəhlizi ilə bağlı texniki məsələlərlə yanaşı Azərbaycan arasında sülh müqaviləsinin siyasi aspektlərə də mühüm yer tutur.
Elxan SALAHOV
