Hazırda MDB PA-nın üzvü olan dövlətlərin parlamentlərinin nümayəndələrindən, Assambleya rəsmilərindən və MDB PA-nın Demokratiyanın İnkişafının Monitorinqi Beynəlxalq İnstitutunun ekspertlərindən ibarət müşahidəçilər qrupu formalaşdırılır.
Azərbaycan Milli Məclisinin sədri Sahibə Qafarovanın dəvəti ilə MDB PA-dan olan beynəlxalq müşahidəçilər seçkilərin monitorinqində iştirak edəcəklər.
Xatırladaq ki, Azərbaycan Prezidenti İlham Əliyev VI çağırış Milli Məclisin buraxılması və ölkədə növbədənkənar parlament seçkilərinin 2024-cü il sentyabrın 1-nə təyin edilməsi haqqında Sərəncam imzalayıb.
MDB Parlamentlərarası Assambleyası Müstəqil Dövlətlər Birliyinin dövlətlərarası orqanı və 1992-ci ildən regionda parlamentarilər arasında qarşılıqlı fəaliyyət üçün əsas platformadır.
Assambleya Azərbaycan, Ermənistan, Belarus, Qazaxıstan, Qırğızıstan, Rusiya, Tacikistan və Özbəkistanın parlament nümayəndə heyətlərindən ibarətdir. 1994-cü ildən bəri MDB PA-dan olan müşahidəçilər Birlik ərazisində və onun hüdudlarından kənarda 150-dən çox seçki və referendumu izləyiblər.
Seçki kampaniyalarının monitorinqi üzrə fəaliyyət MDB PA çərçivəsində fəaliyyət göstərən Demokratiyanın İnkişafının Monitorinqi Beynəlxalq İnstitutu tərəfindən əlaqələndirilir.
MDB Parlamentlərarası Assambleyasının qərargahı Sankt-Peterburqdakı Tavrida sarayında yerləşir.
MDB PA Şurasının sədri Rusiya Federasiyası Federal Məclisi Federasiya Şurasının sədri Valentina Matviyenkodur. (AZERTAC)