11.04.2022, 15:40 456
MTM (Media Təhlil Mərkəzi) dövlət orqanlarının və özəl qurumların Çağrı Mərkəzlərinin fəaliyyət indeksini müəyyənləşdirmək üçün sorğu keçirib. “Qafqazinfo”un bu barədə yaydığı xəbərdə bildirilir ki, bir ay müddətində telefon vasitəsilə həyata keçirilən sorğuda Çağrı Mərkəzlərinin xidmət operativliyi, vətəndaşlarla danışıq səviyyəsi, suallara verilən cavablar və problemlərin həllinə obyektiv, düzgün yanaşma meyarları əsas götürülüb.
Yuxarıdakı meyarlar nəzərə alınmaqla qurumların Çağrı Mərkəzlərinin fəaliyyəti 10 ballıq şkala üzrə 4 səviyyədə qiymətləndirilib.
Sorğuda ən yüksək bal alanlar arasında Qaçqınların və Məcburi Köçkünlərin İşləri üzrə Dövlət Komitəsi də var. Daxili İşlər, Fövqəladə Hallar, Əmək və Əhalinin Sosial Müdafiəsi, Ekologiya və Təbii Sərvətlər, Energetika, Xarici İşlər, İqtisadiyyat, Təhsil və Rəqəmsal İnkişaf və Nəqliyyat, digər nazirliklər, eləcə də Baş Prokurorluq, Dövlət Gömrük, “AzərEnerji” ASC, Kiçik və Orta biznesin inkişafı Agentliyi, “Azərbaycan Xəzər Dəniz Gəmiçiliyi” QSC, “Azərbaycan Dəmir Yolları” QSC də yüksək bal alıblar. Bu qurumların fəaliyyəti onballıq şkala üzrə 9-10 balla qiymətləndirilib. Bildirilir ki, qurumlar zənglərə operativ cavab verir və zərurət olduqda isə müraciətlər (problemlər) nəzarətə götürülür.
Sorğuda dörd qurumun Çağrı Mərkəzinin fəaliyyətinə isə ən aşağı bal (0-2) verilib. Bunlar Müdafiə Nazirliyi (Xətt daim məşğuldur və çalışmır), Müdafiə Sənayesi Nazirliyi (Nazirliyin əlaqə nömrələri işləmir), "Ərzaq Məhsullarının Tədarükü və Təchizatı" ASC (ASC-yə məxsus əlaqə nömrələri fəaliyyət göstərmir), Ombudsman (Çağrı Mərkəzinin nömrəsi işləmir) və Mədəniyyət Nazirliyidir (Qaynar xətt xidməti fəaliyyət göstərmir).
Sorğunun nəticələri ilə daha ətraflı bu linkdən tanış ola bilərsiniz.
Qaçqınların və Məcburi Köçkünlərin İşləri üzrə Dövlət Komitəsi “Qaynar xətt” xidmətinin telefon nömrələrini xatırladırıq:
1657 və (012) 525 41 03
İş vaxtı: I-V günlər, saat: 9:00-dan 18:00-dək
Elektron ünvan: info@refugee.gov.az
