• 8 avqust 2025 ci ildə Azərbaycan Prezidenti, Amerika Birləşmiş Ştatlarının Prezidenti və Ermənistanın Baş naziri tərəfindən Ağ Evdə birgə Bəyannamə imzalandı. Sülh sazişinə aparan bu sənəd mühüm addım olmaqla dünya tarixində yeni bir dövrün başlandığını göstərdi, dünya nizamında mövcud olmuş baxışlara aydınlıq gətirdi.

Azərbaycan xalqının taleyüklü məsələlərinin həlli istiqamətində 1988-ci ildən başlayaraq beynəlxalq müstəvidəki danışıqlar, müxtəlif mötəbər tədbirlər vaxt aparır, görüntü yaratmaq naminə lazımsız danışıqlar təşkil olunurdu. Hətta işğala məruz qalmış torpaqlarımızın azad edilməsi istiqamətində BMT Təhlükəsizlik Şurasının qətnamələri də yerinə yetirilmirdi. Bütün bunları yaşadığımız dövrdə görür, təcavüzkarın cəzalandırılmasını istəyirdik. Lakin ciddi tədbirlər görülmür, regional maraqlara xidmət edən siyasi xadimlərin, beynəlxalq qurumların riyakar münasibəti ucbatından münaqişə - düşmənçilik uzadılırdı.

2020-ci ildə isə torpaqlarımızın işğaldan azad olunması istiqamətində çox əhəmiyyətli addımlar atılaraq işğala məruz qalmış ərazilərimiz düşmən tapdağından azad edildi, 2023-cü ildə isə antiterror əməliyyatlarında separatçıların ərazilərdəki terror birləşmələri məhv edildi.

Əlbəttə ki, düşünmək olardı ki, Müzəffər Ordumuzun qazandığı rəşadətli qələbədən sonrakı dövrdə qarşı tərəf Azərbaycan tərəfindən irəli sürülmüş sülh sazişinin tezliklə imzalanması üçün addımlar atmağa tələsmək arzusunda olacaq, yaranmış situasiyanı dəyişmək üçün regionda sülhün bərpasına məsuliyyətlə yanaşacaq. Lakin bir sıra maraq dairələri hər vəchlə bu prosesə mane olur, revanşizmi təqdir edir, tərəqqiyə nail olmaq yolunda əlavə maneələr yaradır, yüz minlərlə insan həyatını alt-üst edən qarşıdurmaya son qoymaq üçün sülh danışıqlarını pozmağa çalışırdılar. Öz maraqları olan qonşu dövlətlərin məsələyə yanaşmalarındakı ikili standartlar isə nizamlama prosesinə yeni dünya nizamında mövcud olan reallıqlar baxımından yanaşmağı vacib tələb kimi qarşıya qoyurdu. Hazırda regional müharibələrə cəlb edilmiş qonşu dövlətlərin məsələyə diqqətsiz yanaşması, Azərbaycanın Naxçıvan bölgəsi ilə birbaşa əlaqəsini, beynəlxalq kommunikasiyaların azad hərəkətini təmin edəcək Zəngəzur dəhlizinin açılması məsələsində özləri üçün “qırmızı xətt” qoyanlar artıq bugünkü reallıqları nəzərə almaq məcburiyyətindədirlər. Dövlətlər arasında münasibətlər sistemində vaxtında düzgün mövqeni sərgiləməli olanlar üçün yaxın qonşulara həssas münasibət qurulması olduqca vacibdir, çox təəssüf ki, imperiya əhval-ruhiyyəsi ilə köklənınlər bi mühüm prinsipi gözləmədikləri üçün baş verən reallığı birmənalı olaraq qəbul etmək istəmirlər. Təbii ki, Azərbaycanın dövlət başçısı dövlət maraqlarının qorunması baxımından düşünülmüş , ciddi addımlar atmış və bu kurs uğurla davam etdirilir !

Prezident İlham Əliyevin qətiyyətli və məsuliyyətli addımı nəticəsində isə məlum Bəyannamə imzalandı !

Dünyada baş verən müharibələrə son qoyulmalı, tezliklə yer kürəsində münaqişə ocaqları söndürülməli, xalqlar sülh və mehribanlıq qonşuluq şəraitində yaşamaq hüququnu bərpa etməlidirlər. VAŞİNQTONda keçirilən üçtərəfli görüşdə Amerika Birləşmiş Ştatlarının Prezidenti Donald Trampın bu istiqamətdə səylərini daha da artıracağını bildirməsi yaxın günlərdə davamlı sülhə xidmət edən praktik addımların şahidi olacağımızı göstərir. Azərbaycan və Ermənistan arasında sülhün bərqərar olması istiqamətində Vaşinqtonda imzalanmış sənədlər, ABŞ-Azərbaycan strateji əməkdaşlığına doğru atılan addımlar onu təsdiq edir ki, regionumuzda sülh - əminamanlıq tam bərpa ediləcək, xalqlarımızın dinc yanaşı yaşaması, dövlətlərarası əlaqələrin qurulması naminə ciddi tədbirlər görüləcəkdir.

Tarixi reallıq hər birimizdən yaranmış situasiyada yeni, uzaqgörən siyasəti dəstəkləməyi vacib məsələ olaraq qarşıya qoyur. İnanıram ki, Prezident İlham Əliyevin ağıllı, düşünülmüş siyasəti nəticəsində Azərbaycan xalqı yeni-yeni uğurlara imza atacaqdır!

Bu tarixi hadisə ilə bağlı xalqımızı təbrik edir, vətənimizin səmasının aydın , Prezident İlham Əliyevin - Azərbaycan dövlətinin hər zaman güclü və qalib olmasını arzulayıram!