1988-ci ildən başlayaraq Azərbaycan torpaqlarını işğal edən Ermənistan silahlı qüvvələri, Xankəndidə yerləşən separatçılar xalqımıza qarşı soyqırımlar törətdi, maddi-mənəvi irsimizi dağıtdı, yüz minlərlə insanımız doğma torpaqlarımızdan məcburi köçkünə çevrildi. Beynəlxalq təşkilatlar çərçivəsində aparılan danışıqlar, qəbul edilmiş qətnamələr səmərə vermədi, ikili standartlar işğalın müddətini uzatmaq siyasətinə xidmət etdi. Xalqımız nə qədər səbrIı, dözümlü olsa da, 2020-ci ildə Ali Baş Komandan İlham Əliyevin başçılığı altında Müzəffər Azərbaycan Ordusunun qazandığı rəşadətli qələbə tariximizin şanlı səhifəsinə çevrildi, düşmən ordusu darmadağın edildi, torpaqlarımız işğaldan azad olundu.

Düşünmək olardı ki, Rusiya - Azərbaycan - Ermənistan arasında bağlanmış üçtərəfli saziş Qarabağımıza tam sakitlik, sülh gətirəcək. Təəssüf ki, məğlubiyyətdən nəticə çıxara bilməyən Ermənistan dövləti Qarabağda yaşayan erməni separatizminə yenidən dəstək göstərərək ərazidə müharibə ocağının yenidən alovlanmasına şərait yaratdı, qeyri-qanuni silahlı birləşmələr yaradaraq revanşa hazırlaşdı. Elə bunun nəticəsi olaraq, Azərbaycanın polis işçiləri, mülki vətəndaşlar erməni terroruna məruz qaldılar.

Xalqımız sülhsevər təkliflərlə çıxış etdiyi halda, erməni mənşəli insanlar nalayiq davranış və hərəkətlərindən əl çəkmədilər. Havadarlarının dəstəyinə arxayın olan erməni separatçıları növbəti dəfə Azərbaycanın konstitusiya quruluşunu pozmaqdan çəkinməyərək saxta seçkilər də keçirdilər.

Lakin belə davam edə bilməzdi. Ali Baş Komandanın əmri ilə Qarabağda terrorçu qüvvələri məhv etmək üçün legitim antiterror tədbirlərini uğurla həyata keçirildi, mülki əhaliyə heç bir ziyan toxundurmadan separatizmə ciddi zərbə vuruldu. Azərbaycan hərb siyasətinin müasir mübarizə tədbirləri yeni bir tarixi dövrün başlandığını, güclənən Azərbaycan dövlətinin siyasi lideri İlham Əliyevin uzaqgörən siyasətini bir daha təsdiq etdi. Artıq antiterror tədbirləri öz səmərəsini vermişdir.

Aparılan əməliyyat zamanı həlak olmuş şəhidlərimizə Allahdan rəhmət diləyirəm.

Həmişə olduğu kimi, bu gün də xalq-dövlət birliyi çox möhkəmdir, dəmir yumruğun ətrafında sıx birliyimiz bizi daha böyük qələbələrə aparacaqdır.

Ali Baş Komandan, onun Müzəffər Ordusu ilə fəxr edirik!

Qarabağ Azərbaycandır!